INGREDIENTES
Asturcilla ye especial polo que contién y polo que nun contién. Equí contámosvos cuálos son los nuestros (únicos) ingredientes y d’áu vienen.
Ablanes
Cuando comes Asturcilla tas prebando una crema d’ablanes ellaborao principalmente con frutos de variedaes llocales asturianes, del tipu Amandi, Espinaréu, Casina y Grandona. Sabórguiales bien: ye probable que nun prebares enantes estes variedaes d’ablana de sabor esquisitu. Les ablanes tienen el so aniciu n’Asia Menor, y cultívense n’Asturies dende, pelo menos, el Sieglu XVIII. Esti frutu secu encántanos pol sabor, pero tamién poles sos propiedaes: ye ricu en vitamines (B9,B3, C, E y A ), grases saludables (Omega 9), fibra y minerales (potasiu, fósforu, calciu, magnesiu, sodiu, seleniu, fierro, zinc y yodu).
Les ablanes son bones pal corazón polos aminoácidos que contienen, bones pa consumir nel embarazu pol so conteníu en B), bones pa prevenir l’anemia, amenorguen el síndrome premenstrual… ¡son ablucantes! Asturcilla contién un 25% d’ablana que procede directo de productores pequeños asturianos. Cuando, por escasez de collecha, nun podemos consiguir tola ablana necesaria n’Asturies, mercamos ablanes ecolóxiques a productores catalanes.
Lleche de vaca ecolóxico
Asturcilla contién un 31 % de lleche de vaca ecolóxico, evaporao más de 3 hores p’algamar la cremosidá que mos presta y que fai qu’Asturcilla pueda untase cómodo. La lleche ecolóxico qu’utilizamos procede de la ganadería estensivo, en concretu de la casería La Roza (Nava, Asturies), compuesta por 21 vaques que s’alimenten de 14 hectárees de pación llibre de transxénicos o pesticides y que nun consumen en nengún casu hormones u otros medicamentos estimulantes. Amás de tar llibre d’agrotóxicos, la lleche ecolóxico procedente de vaques alimentaes con pación ye muncho más rica n’ácidos grasos esenciales Omega 3, proteínes, ácidu llinoleicu, vitamina E y calciu que la lleche procedente d’animales que consumen piensos industriales.
La nuestra lleche varia nel conteníu en grasa y proteínes a lo llargo l’añu, yá que cambia cuando l’alimentu de les vaques, nesti casu la pación, cambia coles estaciones. Como tampoco ta homoxeneizao con procedimientos artificiales, la lleche cola que s’ellabora Asturcilla non siempre ye igual. Esa ye la causa pola que los llotes d’Asturcilla pueden ser una migayina distintos anque la receta seya la mesma. Trabayamos con ingredientes naturales y el resultáu ye un productu vivu. Apostar pola ganadería estensivo nel nuestru territoriu nun ye namás una decisión que beneficia la nuestra salú y que mos apurre un ingrediente de calidá, tamién ye una apuesta pola sostenibilidá social y medioambiental de la zona rural na qu’habitamos. La casería La Roza foi la primer casería asturiana productora de lleche ecolóxico d’Asturies, permitiendo asina la tresformación y continuidá d’una ganadería familiar en tiempos d’esmantelamientu del sector llácteu, y anguaño da trabayu a varies persones.
Azucar panela
La nuestra panela procede de la empresa Pakta Mintalay Corporacion (Quito, Ecuador) y llega hasta nós a traviés de la distribuidora de comerciu xustu Mundo Solidario. La corporación Pakta Mintalay (qu’en quéchua significa ‘comerciu con equidá’) naz en 2010 y constitúyenla productores y comercializadores de tamañu pequeñu qu’apoyen la comercialización equitativa d’alimentos, preferentemente orgánicos, de productores pequeños y pequeñes nes tierres de los arrabaldes urbanos marxinales d’Ecuador.
Aceite de xirasol ecolóxico
Asturcilla contién un 13% d’aceite xirasol ecolóxico “Ecopipa” de primer prensa en frío. Ye perimportante, ¡gracies a ello consiguimos una meyor emulsión!
Utilizamos l’aceite en crudo, de manera que nun pierda les propiedaes nutricionales, por exemplu l’altu conteníu en vitamina E y ácidos grasos non saturaos.
Amás, el sabor y golor d’Ecopipa son maraviyosos… ¡100% zume de pipa! Esti aceite ellabóralu la familia campesina Becerril Bilbao, en Padilla de Arriba (comarca Odra-Pisuerga de Burgos, na llanada castellana) que cultiva la tierra según los métodos de producción ecolóxico: respetando’l mediu ambiente, ensin usar productos químicos; desenvolviendo’l texíu social y económicu d’esta zona despoblada y obteniendo productos de calidá nutricional máxima.
Cacao puro
Asturcilla contién un 6% de cacáu puro desgrasao. Paez poca proporción, pero’l sabor qu’aporta ye perintensu. Somos amantes del cacáu y de lo llocal, pero abulta imposible atopar cacáu producío n’Asturies… asina que recurrimos a la distribuidora de Comerciu Xustu Adsys Equimercado, que mos apurre cacáu ecolóxico de la cooperativa CONACADO, de República Dominicana. Gracies a CONACADO Asturcilla tien un airín tropical y sabor a chocolate. CONACADO naz en 1985 gracies a una alianza ente productores de tamañu pequeñu y medianu de cacáu y col sofitu del Departamentu de Cacáu de la Secretaría d’Agricultura y l’Axencia de Cooperación Alemana GTZ. El so oxetivu ye meyorar los ingresos y la calidá de vida de les persones productores cacaoteres y les sos families. Nós, dende Asturies, agradecémos-yos l’ingrediente escepcional que mos proporcionen. Y, anque nun faigan falta escuses pa consumir cacáu, recordámosvos que’l cacáu puro ye antioxidante, rico en magnesiu y fierro, xenera sensación de bienestar y, siempre que nun lo tomes mecío con azucres y grases de mala calidá, ¡ye perbono pal corazón!